29 DE XANEIRO 20:30 e 23:00h

Proxección solidaria contra a marea negra

11' 09'' 01. 11 DE SETEMBRO

11 DE SETEMBRO é unha película colectiva composta por 11 curtametraxes cunha inspiración común: os acontecementos do 11 de setembro do ano 2001 e as súas consecuencias. Foi dirixida por 11 cineastas representativos dunha grande diversidade cultural: Ken Loach, Claude Lelouch, Danis Tanovic, Sean Penn, Shohei Imamura, Amos Gitaï, Samira Majmalbaf, Yusef Chahine, Idrissa Uedraogo, Mira Nair e Alejandro González Iñárritu. Cada director desenvolveu o tema de acordo coa súa percepción dos acontecementos, estando presentes as preocupacións e a historia de cada país. A duración de cada curta tamén é simbólica: 11 minutos, 9 segundos e 1 imaxe (11' 09'' 01) Este filme que xa nace como un compromiso de solidariedade entre os pobos, destinando parte dos beneficios obtidos a unha organización humanitaria internacional, será proxectado no Cine Galaxias de Cangas, onde o Cineclub Xiria desenvolve a súa actividade ao longo do ano, e esta vez a recadación íntegra da taquilla irá destinada a colaborar na loita contra a catástrofe da marea negra. Colaboran: Cine Galaxias, Distribuidora Alta Films, Distribuidora Baños Films e Federación de cineclubes de Galicia